ဒီဇင်ဘာ ၆ ၊၂၀၂၅
GG (VOM)
ရွေးကောက်ပွဲ ပါဝင်တဲ့သူတွေကို ထောင်ဒဏ်နဲ့ ငွေဒဏ် နှစ်ရပ် လုံးချမှတ်နိုင်မယ့် ဥပဒေတရပ်ကို CRPH အဖွဲ့က ပြဋ္ဌာန်းကြောင်း ထုတ်ပြန်တဲ့အပေါ် နိုင်ငံရေးပါတီအချို့ကတော့ ဂရုမစိုက်သလို စိုးရိမ်တာမျိုးလည်း မရှိဘူးလို့ ပြန်လည်တုံ့ပြန် ပြောဆိုလိုက် ပါတယ်။
ပြည်သူ့ရှေ့ဆောင်ပါတီမှ PPP မှ ဒုတိယဥက္ကဋ္ဌ ( ၂) ဖြစ်သူ ဦးစောဟန်အေးက “စိုးရိမ်မှုမရှိပါဘူး ။ဒီCRPH တို့ NUG တို့ဆိုတာ လေလှိုင်းကပဲလေ ။ ကျွန်တော်တို့ လည်းမမြင်ရဘူး ။
ကျွန်တော်တို့က နိုင်ငံရေးလုပ်တာ ရှင်းရှင်းပြောရရင် မကြောက်လို့ လုပ်တာဗျာ ။သူတို့ ထုတ်ပြန်ချက်လောက်ကတော့ ဘာဂရုစိုက်စရာရှိမှာ လဲ။ ပွင့်ပွင့်လင်းလင်း ပြောရရင် ဒီကာလက နိုင်ငံရေးလုပ်ရတာ အကျပ်တည်း စိန်ခေါ်မှုတော့များတယ်။ တိုင်းပြည်ရဲ့ အရွေ့တခုကိုသွားချင်တဲ့အတွက် ဆောင်ရွက်နေတာဖြစ်တယ်။ ဒါကြောင့် သူတို့ဘာသာ ဘယ်လိုပဲ ခြိမ်းခြောက်ခြောက် ၊ဘယ်လိုပဲ ဥပဒေတွေ ထုတ်ထုတ် သူတို့ကို ဘာမှ ဂရုစိုက်စရာလည်း မလိုဘူး ။ပြောစရာလည်းမလိုဘူး ။ကိုယ့်အလုပ်ကို လုပ်နေတာပဲ ။ ” လို့ ပြောပါတယ်။
အလားတူ နိုင်ငံရေး ပါတီကြီးတခုဖြစ်တဲ့ USDP ပါတီရဲ့ တာဝန်ရှိသူကလည်း VOMရဲ့ မေးမြန်းမှုအပေါ် CRPH ထုတ်ပြန်ချက် နဲ့ပတ်သက်လို့ ခုလိုတုံ့ပြန် ပြောဆိုပါတယ်။
” ဖြေစရာ အဖြေမရှိပါဘူး။ တရားဝင်အဖွဲ့ အစည်းမဟုတ်ဘူးလေ ။ ကျွန်တော်တို့က တရားဝင်နိုင်ငံရေးပါတီဖြစ်တယ်။ ” လို့ ပြောပါတယ်။
CRPH ကတော့ ရွေးကောက်ပွဲ ပါဝင်သူတွေကို ထောင်ဒဏ်နဲ့ ငွေဒဏ် နှစ်ရပ်လုံးချမှတ်နိုင်တဲ့ ဥပဒေ ပြဋ္ဌာန်းကြောင်းကို ဒီဇင်ဘာ ၅ ရက်မှာ ထုတ်ပြန်လာတာဖြစ်ပြီး ဥပဒေပြဋ္ဌာန်းချက်မှာ ဖော်ပြထားတာ ကတော့ ရွေးကောက်ပွဲ ပါဝင်သူတွေကိုထောင် ၃ နှစ်ကနေ ၅ နှစ်အထိ ဖြစ်စေ ၊ ကျပ်သိန်း ၅၀၀ အောက် မနိမ့်တဲ့ ငွေဒဏ် ဖြစ်စေ ဒါမှမဟုတ် ဒဏ်နှစ်ရပ်စလုံးကို ဖြစ်စေ ချမှတ်နိုင်တယ်လို့ ဆိုထားပါတယ်။
” ရွေးကောက်ပွဲက အောင်မြင်စွာကျင်းပသွားမှာ ။သူတို့လည်း တိုက်ခိုက်နိုင်စွမ်း မရှိဘူး ။ အဲဒီအချက်က အရေးကြီးဆုံးပဲ ။လူအများစုကို ရွေးကောက်ပွဲ စိတ်မဝင်စားအောင် ” လုပ်ထားရင် ” ၊ မဲသွားမပေးအောင်လုပ်ထားရင် ဖြစ်လာတဲ့ ရွေးကောက်ပွဲရလဒ်က တမျိုးဖြစ်မယ် ။လူအများစုက ရွေးကောက်ပွဲကို စိတ်ဝင်စားလာရင် လူအများစုက မဲပေးရင် ဖြစ်လာတဲ့ ရလဒ်က တမျိုးဖြစ်မယ် ။ ” လို့ ပြည်သူ့ပါတီ PP မှ ” ပြည်သူ့ပါတီ ရဲ့ အလုံမြို့နယ် ပြည်သူ့လွှတ်တော် ကိုယ်စားလှယ်လောင်း ဦးရဲကျော်စွာက မှတ်ချက်ပြု ပြောပါတယ် ။
ရွေးကောက်ပွဲ ဖြစ်မြောက်အောင် ဆောင်ရွက်ကြောင်းကို အထောက်အထား နဲ့တကွ ဆက်သွယ်လာပါကလည်း တိုင်ကြားခံရသူကို ဖမ်းဆီးဝရမ်းထုတ်ခြင်း ၊ ရှာဖွေဝရမ်းထုတ်ခြင်း ဆောင်ရွက်ပြီး ဖမ်းဆီးပြီးပါက တရားစွဲဆိုဖို့ ဆက်လက် လုပ်ဆောင်မယ်ဆိုပြီး CRPH ပြဋ္ဌာန်းချက်မှာ ဖော်ပြထားပါတယ်။
လက်ရှိမှာလည်း ဒေသတွင်း လက်နက်ကိုင်တပ်တွေက နိုဝင်ဘာ ၂၉ ရက်နေ့က ပခုက္ကူမြို့နယ်ရှိ ကျားဖြူပါတီရဲ့ ကိုယ်စားလှယ်လောင်း ဖြစ်တဲ့ ကိုဝေလင်းကို ဖမ်းဆီးမှုရှိခဲ့ပြီး အဆက်အသွယ် ပြတ်နေတယ်လို့ သိရပါတယ် ။
ဒါအပြင် ရွေးကောက်ပွဲဖြစ်မြောက်အောင် ပါဝင်နေတဲ့ ရပ်ကျေးအုပ်ချုပ်ရေး မှူး အချို့နဲ့ ကျောင်းဆရာ ၊ ဆရာမ တွေလည်း ဖမ်းဆီးခံရမှုတွေ ရှိခဲ့ပါတယ်။
လက်ရှိ အစိုးရအဖွဲ့ကတော့ CRPH နဲ့ NUG အဖွဲ့အစည်းကို အကြမ်းဖက်အဖွဲ့အစည်းအဖြစ် သတ်မှတ်ကြေငြာထားပြီး အဆိုပါ အဖွဲ့အစည်းနဲ့ ပတ်သက်ပြီး လုပ်ကိုင်နေသူတွေ ၊ ငွေကြေးထောက်ပံ့သူတွေ ၊ အားပေး ထောက်ခံသူတွေကို ဖမ်းဆီးအရေးယူမှုတွေရှိနေပါတယ် ။
